هلا بك اخوي سليمان
ههههههههههه
حرام عليك اتركهم اكيد بعد مايفضو راح يرجعون ويشرفونا بالمايك
يعني ماما تعبت فيني كثييير اكثر من اخواني واخواتي الكبار وبابا برضو تعب فيني كفايه ذيك المشاوير اللي كان يروحها عشان بس الحليب ،، وانا قد ماشكرتهم ماراح اوفي ولو جزء بسيط من تعبهم فيني ،،
وبرضو استحاله انسى دور ابلتي تكفيني الذكرى في تربيتي كنت اغلب الوقت عندها بحكم اني في سن بنتها الكبيره فـ على طول عندها من صغري اقصد من وانا عمري شهور واحب اقدملها شكري رغم انه مايوفي حقها ،،
اللي سماني جدي الله يرحمه وانا اكون اول واخر وحده جدي يسميها من احفاده ،، وانبسطت لمن بابا قالي دا الشي ،،
صح اني في البدايه كنت مدلعه بس وقت صار عمري 11 سنه بابا بطل يدلعني بحكم اني كبرت ولازم يعاملني معاملة بنت كبيره ومو كل شي ابغاه راح وجابه ليا ،،
وكثييير يستغربو لمن اقولهم يا ناس صح انا اخر العنقود بس مو مدلعه زي البنات اللي من جد يكونو اخر العنقود اسم على مسمى
يعني في مره كنت ازن على بابا ابغى للاب توب كان يقولي طيب يسكتني لين عدت 5 شهور طلعت روحي وانا اقوله يقولي انا ماراح اجبلك شي تبغيه روحي جمعي مصروفك واشتريه وفعلا جمعت مصروفي وكنت احرم نفسي من الخروج في وسط الشهر عشان اجمع مصروفي لين اكتمل المبلغ واشتريته الحمدلله،،
ونفس الحكايه اي شي يكون نفسي فيه اجمع واشتريه يعني بصراحه ما اتذكر بابا اشترالي شي قلتله ابغاه غير الالعاب تبع الاطفال وقت كنت صغيره ،،
بس انا مبسوطه من دا التصرف من بابا يعني يعلمنا انه مو كل ماقلنا شي جى لحدنا لازم نتعب للوصول للي نبغاه ،،
علشان نكون امهات للمستقبل ونقدر نعتمد على نفسنا بأي شي مو كل ما احتجنا حاجه رحنا وطلبانها لانو البنت في بيت اهلها مو مثلها في بيت زوجها ،،
كبرت الحمدلله ودخلت الروضه قسم kg3 والغريب او اللي اخواتي مستغريبينه اني الى الان اتذكر اسم معلمتي في التمهيدي واتذكر شكلها وكمان اسماء اللي كانو معايا بالصف 5 اسماء تقريبا لكن الحمدلله طلع عندي ذاكره قويه <<<< اللي يسمعني يقول عمرها 60 سنه مشو حالكم حالكم يمشي على قول احساس ،،
وبعدها دخلت المدرسه الابتدائيه وكانت مرحله جدا هادئه مافيها شي يُذكر بس ممكن في شي ،،
كانت جارتنا معلمه في المدرسه وماما قالت ندخلها هذي المدرسه اضمن وعدت اول سنتين تمام بس سنه ثالثه ابتدائي حصل معايا شي غريب وهو اني فجأه ما ابغى اروح المدرسه وابكي وابكي اترجى ماما اني ما اروح وكنت لمن ادخل المدرسه ما ادخل الفصل اجلس برا وكانو المعلمات وماما كلهم يحاولو فيني وانا ابدا ما ادخل وكنت ابكي من قلبي وقت يغصبوني ويدخلوني الفصل بعد مروري اسبوعين تقريبا ماما قالت لبابا البنت فيها شي مو طبيعي المهم ودوني عند شيخ وقري عليا وقال انها عين والحمدلله مع المويه المقريه والقرأن راحت عني العين ورجعت للمدرسه وكملت 4 سنوات طبيعي وبعدها انتقلت للمرحله المتوسطه وكانت من اجمل المراحل انبسطت فيها كثير وما اتذكر انه في مواقف تستاهل الذكر وبعدها على المرحله الثانويه وكانت اكثر من روعه ،،
سنه اولى ثانوي كانت من اسوأ السنوات اللي في الثانويه سواء من صحبات او معلمات او منهج ا واو او أي شي في مره في سنه اولى ثانوي كان فيه بنات من فصلنا يطالعو من الشباك وكذا مره الابله بتحذرهم المهم في مره وصل الموضوع للمديره ومعروف انه فتح الشباك في الفصل ممنوع خصوصا انه مدرستنا كانت مبنى فيلا في وسط الحاره يعني الشبابيك بتطل على بيوت ثانيه ونادت اسماء البنات اللي وصلتها وانا اتفاجأت انه اسمي معاهم وانا ماسويت شي لكني انظلمت لاني من البنات اللي جالسين نهاية الفصل أي عند الشباك واتهزءو و وصل للضرب كنا واقفين ورا بعض تقريبا 6 بنات وفي الساحه قدام كل المعلمات وكل الطالبات كانت المديره ماسكه مسطره خشب كبيره 100 سم وسميكه كانت تضرب باطن اليد اكثر من ضربه ليه ماتنكسر المسطره في اليد واليد الثانيه نفس الحكايه كانت جايبه 12 مسطره على كل يد مسطره وانا ابكي واحلف اني مظلومه وهذيك يا اذن ماتسمعي ،،، وكنت مره مقهوره والى الان مقهوره منها وخاطري اخذ حقي منها لكن هيهات لانها اساسا خرجت من المدرسه واتأهلت لوظيفة موجهه في الرئاسه العامه ،، وبعدها سنه ثانيه كانت روعه بمعنى الكلمه وسنه ثالثه عاد هذي اخر سنه سنة التخرج كانت جنااااااان بس اخرها زعلنا على فراق بعض ،، بس الحمدلله بنلتقي بين فتره والثانيه ،،
وكنا نسافر بين صيف والثاني اخر سفره كانت قبل 3 سنوات انبسطنا مررره فيها جلسنا شهرين تقريبا حصلي موقف ما اعتقد اني اقدر انساه ،،
كنا في الفندق والكل خلاص تعبان ودخلو نامو بقينا انا واختي الكبيره مافينا نوم وبصراحه كنا جيعانين ومافي شي يتاكل غير ساندويتشات بالجبنه واحنا مانبغى كان خاطرنا بشاورما وكنا نعرف محل يبيع شاورما على كيف كيفكم وهذا المحل في منطقه اسمها stret 3 ومعروفه بالخليجين اغلب اللي فيها من الخليج سواء سعوديه او كويت او امارات او بحرين او قطر ...... غامرنا وخرجنا من الفندق واخذنا الكرت معانا تبع باب الغرفه واحنا العاده نتركه تحت في الريسبشن بس للاسف ماكان فيه احد البنت اللي كانت مناوبه ماكانت موجوده ممكن كانت مشغوله بش اخذناه معانا وخرجنا على الشارع العام وركبنا تاكسي وقلناله على المنطقه و وصلنا نزلنا ورحنا سيدا على محل الشاورما وطلبنا وجلسنا نستنا الطلب لانه المحل كان زحمممممه وخلص ودفعنا وخرجنا وؤكبنا التاكسي وقلناله على الفندق و وصلنا وطلعنا وقفنا قدام الباب وادور في جيبي على الكرت مو موجود واختي تدور برضه مو موجود هنا هنا هنا مو موجود قلت شكله طاح في التاكسي او في المحل ،،، واتورطنا لو جينا ندق على غرفة ماما وبابا عشان هم يفتحون لنا باب غرفتنا لانها غرف مفتوحه على بعض يفصل بينهم باب راحو يسالونا وين كنتو قلتلها امشي ننزل ونكلم البنت المناوبه ممكن ترضى تعطينا كرت يفتحلنا الباب ونزلنا والبنت للاسف الشديد ياغافل لكم الله ماتعرف تتكلم انجليزي واحنا ما معانا غيره مانعرف نتكلم تايلندي وصرنا نتكلم معاها بالاشاره بالزوووور حتى فهمت واعطتنا كرت ودخلنا الغرفه وشكرناها ودخلناا اخذنا نفس عمييييييييييق جدا واكلنا الحمدلله وعدت الليله على خير وثاني يوم خرجنا مع بعض وبابا وقف عند الريسبشن واعطي البنت الكرت وسألنا قلنا لامايحتاج خليه معانا <<< مايدري انه ضاع وخرجنا ولمن رجعنا بالليل اللي كانت موجوده البنت حقت امس تذكرتوها صح ،،، طلب منها بابا الكرت وسالت عننا وسارت تتكلم مع بابا بالتايلندي واظنها فرطت لبابا كل السبحه بابا ضحك وطلعنا وانا اقول للاختي الله يستر شكله ابوكي ماراح يعديها وطلعنا وبابا هزئنا لين ماقال ياساتر ،،،، واكيد انتو بتقولو حرمتو تعيدوها لكن هيهات عدناها وكل مره نتهزء المره اللي بعدها نقوى خخخخخخخخخخخ ،،،
الى اللقاء في الرد القادم